心藍 新男計劃
A Better Man Project

現今世代,到底點樣先至係「好男人」?

識換電燈膽? 唔淨係用下半身思考? 有車有樓有份好工? No Way!
透過《心藍・新男計劃》,
盼望年青人不再只用狹窄定義和過去歷史限制自己,
就容讓我們不一樣,做自己心目中的 Better Man。

 

心藍・新男計劃

​A Better Man Project

本計劃由香港小童群益會推行,並由禁毒基金全力贊助,
主要為東九龍區有濫藥或已戒毒的21至35歲年青成年男性提供支援,
透過輔導服務及一系列成長活動,強化他們作為兒子、父親、伴侶及僱員等角色功能,從而提升他們積極抗毒的能力,
長遠亦有助減低跨代濫藥的風險,共建健康無毒生活。

file-1.jpeg
 
 

個案輔導

透過個案輔導,盼望年青男士能:

- 了解及面對成長上的適應困難

- 評估及提升自己在不同社會角色上的功能

- 認識持續濫藥對個人的影響

- 制訂戒毒計劃 / 預防復吸計劃

除服務 21-35歲曾濫藥或正受毒品問題困擾的年青男士,本計劃亦會因應需要為其家人、伴侶提供面談,以協助進一步提升彼此互動及關係,鞏固他們在社會上的角色功能。

專業培訓工作坊 ( 額滿 )

「從童年依附關係理論及家庭治療角度,

探討年青男性濫藥議題」

《因應新型冠狀病毒情況,大會並未能安排講員於現場授課,故九月份培訓工作坊將安排以網上形式 (Zoom) 進行直播教學。有關網上培訓登入詳情,大會將於培訓前2-3天透過Whatsapp 及電郵作出通知。不便之處,敬希原諒。》

● 日期:

    A組 ─ 2020年9月11(五)、9月25(五)及9月26(六)

    B組 ─ 2020年10月9(五)、10月16(五)及10月31(六)

● 時間: 14:00-17:00

● 地點: (改以 Zoom 作網上直播)

● 對象: 戒毒專業 / 青少年外展服務 / 家庭服務同工、醫護同工及
有興趣參與的同工

● 費用: 全免

● 名額: 25人 (每組)

● 主辦單位: 香港小童群益會 心藍‧新男計劃

● 贊助單位: 保安局禁毒基金

● 講員:

王愛玲博士 (美國婚姻及家庭治療協會認可專業督導、資深家庭
治療師)、譚子麟先生 (綜合家庭及系統治療 (I-FAST) 認可督導)

● 查詢/報名: 2347 2733 (李姑娘 / 彭先生)

                     5236 0505 (Whatsapp)

 
國際禁毒日街站.png

國際禁毒日街站

 

「飲定唔飲?」堅係豐富大獎問答

 

《結果公佈啦喂📣》
「飲定唔飲?」堅係豐富大獎問答
終於完滿結束啦!! 多謝大家熱烈參與!
亦恭喜以上三位巴打答啱最多題
並順利贏得豐富大獎 🎁🛍
(1) 肌肉按摩槍
(2) 航拍機
(3) 藍牙喇叭
得獎嘅幸運兒記得留意WhatsApp
下星期一前將會有同事聯絡你親身領獎!
而其他有份玩嘅巴打都唔洗灰心
你哋都會獲贈「一世平安福袋」(價值$300)
同事將會聯絡你並郵寄到你屋企!
.....

 

《豐富獎品出沒! 注意!》
琴日說好的新年特備節目
3...2...1....正式揭曉!!!
係有獎問答遊戲呀!!!
準備好抽到大獎拎晒⋯
航拍機、按摩槍同藍牙喇叭返屋企未?

新年放幾日假期
少不免會同親戚朋友食吓飯飲兩杯
今次有獎問答題目同飲酒有關
自問對酒精好熟悉嘅你
對豐富獎品好心心眼嘅你
即刻喺IG story 嘟QR code
或者㩒profile 條 link 入嚟挑戰啦!

 

​最新消息

 

《活動公告》

係! 疫情又返到去每日100宗確診!
仲要區區有確診 遍地開晒花 (Oh no!)
所以為咗保障大家嘅健康
小編忍痛地都要通知各位一聲
12月12日前呢個星期
A Better Man計劃嘅「部份活動」
需要暫時改期/改為網上型式進行
詳情請向負責社工同事了解返!

記得有時人唔喺度
但我哋關心你嘅心仲喺度
有咩嘢繼續 WhatsApp / DM
另外請密切留意我哋網上活動 & posts
仍需日日外出返工嘅大家多多保重身體
祝睇緊post嘅你在亂流同疫情下平安!

⚠️如因經濟狀況欲領取防疫物資,請聯絡我哋⚠️

 

《我愛你,你Feel到嗎?》
巴打們 2.14 情人節快樂!
趁今日係情人節
小編S 就同大家傾吓「伴侶相處」

伴侶相處總會有鬧交、爭執嘅時候
「我已經好努力啦,仲想我點?」
但其實真係有幾努力呢?
咁到底邊度出問題呢?

同伴侶相處越耐
我哋開始越嚟越懶
慢慢將一切公式化
揀嘅餐廳、去嘅地方、講嘅話題
頭一個月就新鮮
之後過幾個月就開始重重複複
未必有興趣想再了解對方
佢鍾意食乜、重視乜、諗緊乜
因爲咩唔開心有時都唔重要
只要我/對方做嘅一切符合
呢個叫「伴侶」嘅身份就可以收工
但你真係想咁樣「努力落去」嗎?
有時你唔做 有時做咗對方又feel唔到
的確讓人好氣餒⋯

.....

 
新春收爐.png

噢耶~年又過年》
牛年話咁快到咗啦!!!
新一年Better Man 祝大家身體健康
新嘅一年祝你同家人遠離肺炎
唔理你過往一年咩狀態 有咩經歷
新一年就係有新嘅好開始!

聽日大年初一巴打們好好同屋企人
食吓飯 團吓聚 好好過年啦
Better Man 小編們都收爐啦
我哋將於初五(16/2)啟市呀!

雖然我哋叫做收爐
但係我哋年初一到年初三 (12-14/2)
已預備咗特別環節等緊大家
大家記得留意 切勿錯過!!!
冇咩事小編收工返去煎糕食啦
下年見!!!

 
signal.png

《唔洗掙扎 即用熄爐》

為讓大家多一個安全途徑聯絡我哋,Better Man 即日起亦增加了Signal 平台同各位互動。
緊記,保持聯絡!

 

唔check唔知身體好

好消息! 真係好消息!
改嚟又改去..大大話話都停咗半年啦!
咩活動? 之唔係免費健康評估囉!

熟客仔如果呢段時間儲咗啲健康問題
甚至係睡眠或者情緒狀況
幫人問好 幫自己問好
歡迎搵我哋再報名嚟見護士叔叔!

新客仔 當然我哋更加歡迎
如果你係曾經毒海浮沉過
想做個免費健康評估
又想要100% 保密安全
Follow me! 嚟啦!

日期:30/11/2020 (一)
時間:7:30pm (每人約有30-40分鐘)
地點:本中心
有興趣嘅巴打咪等啦
快啲Whatsapp/DM我哋報名啦!!

 

《未出發·先興奮》


四五位互不熟悉嘅好男人
每星期三晚上抽出兩小時
人人都帶住相機同故事走進中心
展開了《攝影·說影》嘅旅程

未來仲有八個晚上
唔知旅程會帶我哋行到去邊
又或者睇到咩風景
小編同大家一樣滿心期待
準備好自己 準備好相機
Here we go, buddy!

攝影師: KW
Model: Fox
*此相片已得到當事人及攝影師批准發佈
——————————————
A Better Man Project 心藍·新男計劃
同行。同傾。同戒
👉🏻52360505
👉🏻Facebook: a_better_man_project
👉🏻www.abettermanprojectbgca.org

#呢張咁有意境嘅相係組員KW影㗎 #掌聲鼓勵 #photovoice #攝影說影 #攝影小組 #人人都是攝影師 #用相片說故事 #一人一故事 #abetterman #心藍新男 #bgcahk #kwuntong #hkig

 

《放工不如郁吓啦》

早排康文署啲場地收晒檔
日日喺屋企 即使帶住運動手錶
懶係睇住心跳步數
但其實已經好幾個月冇認真運動
係⋯呢個正正係小編心聲
唔知你又係咪咁呢

疫情彷彿已是常態
與其日日 心思思但又有藉口
係時候不如搵埋三五知己
開始做返基本體能
接觸返定時運動嘅lifestyle

10月22日晚上 8-10
場都book 埋 球拍都借埋
爭你咋! 郁吓啦! 免費㗎!
5236-0505 WhatsApp 小編報名啦!

*請於運動期間留意個人衛生,
並佩戴口罩保護自己及他人!

 

《師兄弟,歸位啦》

疫情來來回回 由第一波
去到依家已經第四波
好多活動都又取消又延期⋯
我哋實在受夠啦!
之前應承咗大家 說好了的
「攝影小組」&「每月運動夜」
即時恢復! 請留意以下時地人!

Sports night 🏓🎱🏀🎾
時: 19/10/2020 8-10pm
地: 東九龍康文署運動場
人: A Better Man 計劃各好男人+家人
銀: 當然係免費

攝影·說影小組📸
時: 28/10/2020 8-10pm第一堂
地: 本中心/ 外借影樓
人: A Better Man 計劃各好男人
銀: 當然又係免費

想參加? 可以DM我哋或者WTS 我哋
一齊做個型爆又文武雙全嘅好男人!

 
IG social distance.png

今期關鍵字係「2米, thx!」
咩係Social Distancing (社交距離)?
由早幾日政府公佈一系列法令
要食肆每張枱有最少1.5米距離
.
⭕️以下小貼士幫你情緒叉叉電⭕️
1•防疫不等於要斷六親,可以多運用科技與親朋好友互相關心! (小編早兩日防疫成就解鎖! 用Video call 同朋友一齊喺屋企食外賣同打switch

2•新聞日日都多,但呢一年學識Fact check 好緊要! 留意資訊接收的真確度,不要輕易相信及轉發,避免過分焦慮!

3•在安全情况下,係100% 安全情況下 (例如附近無人或大自然環境下),短暫除下口罩呼吸幾秒新鮮空氣!

最後 Touch wood 萬一發現
自己情緒愈來愈差
請隨時與身邊人分享
正視關心自己裡面發生咩事
亦可尋求專業人士幫手傾傾!
記住記住!
千祈千祈!
唔好同自己嘅真實情緒
keep 住2米thx 的距離呀!!!
香港人一齊加油💪🏻

 

《大麻二三事》
成人資訊留意返! 今晚同大家講「大麻 & Sex」

網傳「吸食大麻可增加性能力?」
「大麻可以當偉哥?」
可能會有人即刻諗:咁幾好喎! 一舉兩得!
大麻比食煙好似健康D又可以當偉哥
事前食兩啖 Relax 吓自己
食完之後 成個人仲會勁D有活力D!
到底呢啲講法有幾真呢
嚟到一個乜都要 Fact check 嘅年代
等小編俾返啲資訊大家啦!

的確 史丹福大學做咗個研究發現
吸食大麻與性行為係有直接關聯
(1) 男性有吸食大麻平均每月有6.9次性生活,
沒有吸食的則 平均有5.6次
(2) 吸食大麻劑量增加,性生活亦逐步增加

......

(詳情請點擊下面)

 

《大麻二三事》
深夜學術台! 大麻使用者只係求 Chill?

上回講到...大麻裡面有2種關鍵成份
分別係 THC (四氫大麻酚) 同埋CBD (大麻二酚)
前者俾人刺激亢奮嘅快感

後者達到減少疼痛感同壓力
好多唔理解呢樣嘢嘅朋友仔
好直接就會覺得 High嘢隊草嘅人
唔潔身自愛 仲細個咩
佢地可能會問:
其實係咪可以有其他選擇呢?
其實你知唔知自己需要緊啲咩?

......

(詳情請點擊下面)



 

《大麻二三事》
(係少少長文但唔洗慎入)

大麻呢樣野 唔講唔覺
近呢幾年愈來愈多人使用
大麻支持者成日掛喺口邊都話好 Chill!
鍾意大麻嘅朋友會認為
吸食大麻係一種生活態度
大麻甚至今時今日融入咗飲食
音樂、生活文化等等
藝術人音樂人更加當佢係靈感來源

講到大麻咁神聖
你喺日常生活都可能有接觸過
但到底大麻係咩嘢?
食開想戒嘅人諗緊啲咩?
你又知唔知如果今日你拎住枝大麻
一呼一吸 其實你又食緊啲咩?

......

 

Better 乜系列

 

各位巴打大家好呀!
疫情反反復復 大家唔係番工就喺屋企
街又冇得去 Friend又冇得見
飯又冇得食 係屋企On居居咁
我-哋-搵-咩-搞-好-呀-!-?
.
如果你係以上情況既人士
嚟緊我哋會推出連串新節目
小編都幾肯定 一定有嘢啱你睇!
讓大家短時間睇片學嘢
由 Good 裝備升呢變 Better!
.
新節目有唔同環節 分別有
Better Health (講健康) + Better Family (講家庭)
仲有學鄭秀文咁講Better Me (講個人成長)
當然最緊要係有各位Better Man 捧場啦!
想學吓嘢? 想裝備自己?
咁就記得留意我哋啦!!!

......

 

《Better Health第一炮》
今次教大家簡單煮食雞胸肉
「雞胸肉有咩好食啊」
「成日話雞胸肉有營養,係咪㗎?」
.
普通人每日每公斤體重
其實要攝取約1g嘅蛋白質
運動量比較大嘅人就應該食1.2-1.6g嘅蛋白質
假如一個體重70公斤
而且運動量比較大嘅人
就應該每日攝取112g嘅蛋白質
雞胸肉有咩優點?
高蛋白、低脂肪、低熱量
100g嘅雞胸肉有 ...
119卡路里同23.3g嘅蛋白質
如果大家想要充足嘅蛋白質
又唔想飲或懶得飲蛋白奶粉
但又唔想變做肥仔 搞到有肥仔波
雞胸肉絕對係唔錯嘅選擇!
......

 

Better Health 第二炮》
Better 乜系列又有新片 上次跟小編煮完雞胸
今次同你試畫 Zentangle (禪繞畫)
放完長假期 仲係心散散想搵嘢玩?
拿拿聲攞支筆 攞張紙 join我哋啦!

✅Zentangle 係乜?
「Zentangle」是近年新興的藝術,「Zen」是「禪」的音譯,「Tangle」則是指纏繞式的繪畫方法,中文稱之為「禪繞畫」,源於美國一對藝術家夫婦,利用針筆、鉛筆、紙筆等簡單工具,於紙張上畫圖案,線條元素包括點、直線、弧線、蛇形和圓形,即「iCSO」,只須把不同的線條搭配起來,並重複繪畫,即可演變出有趣圖案!

✅想畫Zentangle 有咩嘢準備?
材料工具簡單:
🔺一枝針畫/粗黑筆/鉛筆
🔺一張A5 / 正方形紙
🔺一兩枝螢光筆*
🔺任何一盒顏色筆*
* 可選擇填色與否

✅Zentangle 除咗影相呃Like仲可以學⋯

......

 
better family1.png

Better Family 系列

《小朋友尖叫⋯點教好?》
好不容易嚟到星期日晚
疫情下乜嘢設施同公園都閂曬
感覺長時間同小朋友喺屋企困獸鬥
經過星期六星期日全時間 “埋身大戰”
無論係全職在家湊仔嘅家長
定係雙職嘅父母
小編確實都聽唔少
有時小朋友嘅「失控」讓佢地好煩惱
出咗街喺大庭廣眾 更加尷尬
今日就等小編同家長們傾傾呢個話題!

身為家長嘅小編 真心深表明白
好多人都會覺得當小朋友失控尖叫
叫小朋友收聲係最快嘅方法
但其實叫小朋友收聲 = 徒勞無功
甚至後果難以想像

......

 

Better Family 系列

《玩⋯其實唔單止係玩!》
呢排疫情 好多父母都以「困獸鬥」嚟形容
在家與小朋友長時間相處嘅情況
對於小編呢啲雙職家長
平時返工會覺得唔夠時間同小朋友相處
但到咗有空間靜落嚟嘅時候
又發現其實唔知點樣同小朋友相處
面對眼前的精力充沛嘅「人仔」
家長卻日日夜夜成為被佢玩嘅對象😂

其實⋯「玩」唔單止係玩咁簡單
遊戲嘅過程係
小朋友認識世界最自然嘅方法
亦可以從而訓練小朋友成長
仲可以增加親子感情
今次會集中同大家分享
可以同三歲以下小朋友玩嘅親子遊戲
雞精攻略喺晒上面👆🏻👆🏻👆🏻
大家可參考吓以上例子
再揀適合自己小朋友嘅遊戲(帶頭盔!)😅

......

 

好男人文章 - 在家科普3分鐘

《溝酒飲容易醉?》​

老老實實 呢幾日聖誕節假期
知道大家少不免會飲幾杯(or 幾支)
講到飲酒經驗 相信大家都唔少
但飲酒知識 你又識唔識!?

江湖傳聞話「溝酒比較易醉」
問下大家一個問題先
● 連續飲6杯威士忌
● 飲完3杯啤酒 再飲3杯威士忌
到底邊種飲法會醉先??
答案喺下面⋯

3⋯
2⋯
1⋯

答案係連飲6杯威士忌。

點解我哋飲酒會醉呢?
其實主要關鍵在於「酒精攝取量」
簡單嚟講
肝臟一次只可以先處理一定嘅酒精量
處理唔曬就會留喺血液度
所以就會出現醉嘅現象啦
當然 如果唔想咁快醉
梗係飲慢啲 俾肝臟有足夠時間消化
或者一杯酒夾一杯水 / 無酒精飲品
又咁講 當然最好就係飲少啲啦
成日大量飲或者日日飲
你個肝好易打柴
到時任達華都救你唔到啦 (明就明)

記住 酒梗係開心先飲
相反 古人都話「酒入愁腸愁更愁」
都係嗰句 巴打有咩苦水可以揾我哋傾啦!

好男人一定要係咁架咩.png

《男人都有情緒㗎》

係呢個咁嚴峻嘅疫情
番開地盤、倉務、跟車送貨嘅你
從事飲食業嘅你更加係首當其衝
開工唔夠,又要被逼放無薪假
仲有可能被炒魷,要失業
生活可謂徬徨無助
.
身為男人,無論你幾能屈能伸
呢個時候,幾硬淨都可能頂唔緊
心急、燥底、食唔安訓唔落
又唔知點搵人傾
慢慢就開始唔想理啲情緒壓力
無意中搞到自己又煩又孤獨⋯
.
講親「情緒感受」好多時都會聯想到女性
成個社會好似同大家講
「發洩情緒係懦弱/ 唔夠堅強嘅行為」
搞到啲男人好似要同情緒保持距離咁
但其實情緒冇分性別 人人都會經歷
人天生有喜怒哀樂
有唔同嘅情緒係正常嘅!
.
情緒需要適當表達同管理
無謂自己孤立自己
所以由今日起 巴打們⋯
有需要嘅話就同身邊嘅人分享啦
若果情緒超負荷要呻吓噏吓 DM我哋啦!

《失眠症患者揮手區》

小編最近經常失眠 眼光光 等天光
感覺周身唔聚財 日頭又冇精神
咁樣返工 簡直係折磨呀大佬
各位打工仔 你哋又瞓得好唔好呢?
.
翻睇資料⋯2001年有本地調查發現
每9名男士入面就有1位表示睡眠質素欠佳
原來男士失眠嘅比例都唔低呢!
.
其實「失眠」呢個概念好籠統
你或者家人朋友成日瞓得唔好
又屬於邊款失眠情境呢?
🥱「好難入睡 典極都瞓唔著」
😣「瞓着咗好易醒 醒咗後好難再瞓得返」
😧「無論幾點瞓 總比預定時間早兩三個鐘醒」
😵「徹夜難眠 成晚眼光光」

《當戒毒遇上酒⋯》

喺 A Better Man 呢個計劃入面
小編遇到一部分好男人曾經毒海浮沉
但今日都已經成功戒毒
卻仍然慣咗口放工出街飲幾杯 (幾支)
當減壓好 應酬好 甚至當吸毒以外嘅替代品
又或者已經不知不覺成為多年習慣

與其直接對大家飲酒呢件事Say no
小編今日想同大家繼續科普3分鐘
繼尋日講完「手機成癮」
今日講吓另一種有可能成癮嘅行為迷思—飲酒

《你係咪手機上癮患者》

呢排留喺屋企時間長咗
係咪撳手機嘅時間都長咗呢
有冇試過臨瞓前掛住撳手機或打機
搞到失眠 第二日又冇曬精神呢?
如果你間中甚至經常係咁嘅話
可能你已經出現「電話上癮」狀況!
.
點先叫做「上癮」?
上癮其實就係一啲重複性習慣行為
-如果呢個行為令你有強烈渴望
-如果呢個行為每日佔你好多時間
-如果呢個行為會引致負面後果而你堅持繼續進行
-如果你曾嘗試但仍然唔能夠停止,
甚至有啲失控嘅感覺… 咁好可能你癮已上
.
上癮呢個字我哋一般理解都唔係健康嘢
例如少則咖啡因上癮、大則飲酒成癮、藥物成癮
咁你話比起飲酒同吸毒咁傷身
「智能電話上癮」都唔係好壞啫!?
咁講真 除咗對眼晴對頸椎唔好、
對大人同小朋友 (好爸爸請留意) 嘅閱讀能力
同埋專注力 忍耐力都唔好
原來嚴格嚟講 對精神健康都唔係咁好
特別近年網上好多資訊都令人沮喪焦慮...
過度被資訊轟炸 仲要無限FC
真係會搞到心情同精神好差!
.
各位巴打多咗時間留喺屋企嘅話
不妨試下食飯時 臨瞓前放低手機
好好同自己 同埋屋企人相處下啦!

來源: lospsychology、鄭健榮博士《沉溺行為與治療》(2005)

 

好男人文章 - 新男心事台

 

​​《好男人心事台-08》

《做人要心存希望》
講希望? 唔好玩啦!
今時今日喺香港地仲邊有希望?
今時今日我嘅生活仲邊有希望?

我知我知 你可能望住身邊環境
望住每日讓人焦慮炆憎嘅新聞
其實都好難會心存希望
但其實 有陣時個人有冇盼望
係講緊你嘅心態同信念
小編好鍾意聖經有句智慧說話
「信是所望之事的實底
未見之事的確據」(希11:1)
講返人話就係「信心/希望」呢啲
其實係個人心態、信念
係㗎 可能未見到事情有轉變㗎
但我信 我抱住希望
講白啲 見得到 (已有改變)就唔洗信
因為已經發生咗 洗鬼心存盼望信念咩

喺一個灰色的城市同氛圍
一齊學習吓 抱住希望信念做人啦
有信念有希望
即使世界原來不像你預期
你都會有多少少動力行下去。
共勉之。

好男人文章 - 好男人家事

《自責要短暫 不過要⋯》

日頭番工番到頹! 夜晚湊仔湊到炆!
小朋友越嚟越大 摩擦就越嚟越多
有時爆煲控制唔到自己
將自己情緒發洩咗落小朋友度
鬧完佢之後 其實好後悔自責
然後重重複複 無限輪迴 你有試過嗎?

冇一個爸爸係完美嘅
有時嘅「唔完美」可能係性格影響
口直心快嘅人,講嘢就好直
好有行動力嘅人,節奏就好快
呢啲「唔完美」唔代表性格係錯
反而要了解、承認同接受自己

了解完、承認完 但係一樣會好心急
到底爸爸們 我哋點做好?!
不如試下改變習慣同行爲
慣咗講嘢好快?試下培養慢慢講嘅習慣
慣咗做好曬決定?試下同小朋友慢慢討論

改變行為同習慣唔易 我知!
英文有句說話: One step at a time.
每次訂一個小目標 行一少步
慢慢就熟能生巧 亦愈行愈順

親子育兒嘅路唔易行
但唔好走唔出自責嘅漩渦
冇曬信心、懷疑自己能力
甚至最後放棄 乜都唔理? No way!

容許自己犯錯,請求小朋友嘅原諒
就算係幾資深嘅兒童教育工作者
一定會有犯錯嘅時候
重要嘅係坦誠同小朋友道歉
講下點解發脾氣、聽下小朋友嘅感受
好好溝通 然後放低呢份自責

各位巴打 做人爸爸梗有壓力
多啲揾身邊人分擔下壓力 或者揾我哋傾下
總之緊記 One step at a time
改變心態 改變行為 壓力自然減少一啲。

《3個親子溝通大法》

又嚟到星期日 Family day
爸爸們 今日終於唔洗返工可以抖下
但大家有冇發現星期日
有時都容易讓你同伴侶多咗爭吵?
好多時候伴侶家人都好想各位巴打
終於到Family day同仔女溝通多啲
但慢慢可能變成你哋伴侶之間嘅爭執!
.
明嘅明嘅 等小編推薦3個方法可以幫幫
各位煩惱中的好爸爸啦!

1️⃣調整心態咪比較:老公唔係老豆
有啲時候伴侶認爲心目中嘅爸爸就要好似自己爸爸咁
但各位巴打來自唔同嘅家庭長大,自然對「爸爸」嘅諗法同伴侶唔同。例如伴侶覺得「爸爸」係要對仔囡嚴厲,

而巴打覺得「爸爸」同仔囡玩,大家自然就會發生爭執啦,呢個時候,反而要問下各位巴打,你哋期望仔囡有一個點樣嘅爸爸呢?
.
2️⃣「俾位」發揮:等仔囡決定爸爸嘅角色同地位
各位巴打番工時間長,同仔囡相處時間就會少咗
可能仔囡心目巴打嘅地位同角色就有啲模糊
其實唔緊要,最緊要巴打點同仔囡相處
各位巴打可以按仔囡最鍾意嘅方式去玩
或者刻意安排一啲事,同仔囡享受單獨相處嘅時光
.
3️⃣以夫妻身份為先:你係爸爸,都係老公
有咗仔囡後好多夫妻都會用「爸爸,媽媽」叫對方
時間一長,可能真係當咗對方係自己媽媽或爸爸
咁就好有機會影響夫妻之間嘅感情啦
所以當仔囡大個啲時,用番「老婆、老公」叫對方啦
記住!記住!記住!
太太係你嘅老婆,唔係你阿媽
你都唔係阿仔,係老公呀!
.
一個家庭當中,最緊要係夫妻之間嘅合力
咁仔囡成長就會感受到愛護同安全啦♥️
.
Reference: POPA(2020)。怎樣可以鼓勵爸爸多參與育兒,和孩子多點互動?

《謝謝報道好男人故事》

我,曾經只得「吸毒者」的身份,但今天我正奮力成為別人的「好兒子」、「好伴侶」、「好爸爸」。

Posted @withregram • @bgcahk 【你我身邊兩三事.特別的父親節】
.
疫情持續,不少人外出和慶祝活動需要暫緩。於是 A Better Man Project 心藍.新男計劃(@a_better_man_project)推出「老豆節小攻略」,讓一位爸爸在家中渡過了一個特別的父親節。
.
這位爸爸是一家五口的經濟支柱,長期靠勞動維持生計的他,甚少有時間陪伴兒子。他自少失去父親,加上社會對家庭結構刻板的定位,令他難以理解模糊的父愛,認為一直只要努力工作,讓家人衣暖食飽,內斂地表達關愛便足夠。
.
夏日將至,他決定在父親節親自為兒子們理髮。當兒子安坐在鏡前時,他有點緊張地踏出第一步,輕輕地剪掉兒子的瀏海。兒子興奮地指揮他剪髮,並向他分享生活點滴,兩父子變得無所不談。兒子非常滿意新的髮型,摟住他說:「爸爸好犀利,剪得好靚!」他發現自己不只剪短兒子的頭髮,還縮短了和兒子的距離。父親的角色比想像中簡單,其實只要願意花時間與兒子們相處和互動,他們就明白和體會到父愛。兒子的鼓勵亦成為這位爸爸建立親子關係的動力。
.
「心藍。新男計劃」為有濫藥或已戒毒的青年成年男士提供輔導和成長活動,強化他們在家庭的角色功能。雖然疫情令部分活動暫緩,但同時成為機遇,透過全新網上互動繼續連結男士們,將更多轉變帶到他們的家庭中。
.
(資料圖片非受訪者本人)

 

​活動回顧​

 

​🧧新春鼠年利是封DIY工作坊

​​聯絡我們

如對本計劃有任何查詢或有合作洽談,

歡迎於信息欄留下個人資料,或可透過以下方法聯絡計劃同工。

服務時間
星期一至五:上午 10:00 至晚上 10:00
星期六:上午 10:00 至下午 2:00
(按服務需要,服務會於非辦公時間進行)

​九龍觀塘廣田邨廣田商場212室

WhatsApp 傳送門 🚪

WhatsApp: https://wa.me/85252360505

以下是我們的Instagram專頁YouTube 連結,歡迎點擊以了解更多資訊。

+852 5236 0505 / 2347 2733

F: 2347 4450

  • Instagram
  • YouTube
  • Facebook
Mobile Phone
 

©2019 by 心藍・新男計劃 A Better Man Project. Proudly created with Wix.com